ئەمڕۆ دوو شەممە ٢١ی شوباتی ٢٠٢٢، لە ڕۆژی جیهانی زمانی دایک دا، بە ئامادەبوونی بەڕێز (پ.ی.د. موفق خالید ابراهیم) سەرۆکی زانکۆ و ڕاگری کۆلێژی پەروەردەی بنەڕەت و بەشێك لە مامۆستایان و خوێندکارانی زانکۆ و خوێندنگاکانی سنوری پەروەردەی ڕانیە، بەشی زمانی کوردی لە زانکۆی ڕاپەڕین، سیمپۆزیۆمێکی زانستی لەژێرناونیشانی“زمانەكان و ململانێیان لە پێناو مانەوە و بە جیهانیبونیاندا” لە هۆڵی چالاکیەکانی زانکۆ ڕێکخست .

لە دەستپێکی سیمپۆزیۆمەکەدا، بەڕێز پ.ی.د. رزگار حاجی صاڵح راگری كۆلێژی پەروەردەی بنەڕەت لە وتەیەکدا: وێڕای سوپاسی ئامادەبووان، پیرۆزبایی ڕۆژی جیهانی زمانی دایک- ی لە ئامادەبووان و خوێندکارانی زانکۆ کرد، هەروەک وتیشی: زمانی کوردی لە ڕووی مێژویی زمانە جیهانییەکانەوە بە یەکێک لە زمانە هەرە دەوڵەمەندەکانی میژوی مرۆڤایەتی ئەژمار دەکرێت، هیواشی خواست ئەو ڕۆژە بکرێتە دەرفەتێک بۆ یەکتر قبوڵکردن و یەکڕیزی نەتەوەییمان.
دواتر لە سیمپۆزیۆمەکەدا ، بە سەرپەرشتی پ.ی. ڕێژنە معروف حسێن، سێ سیمینار پێشکەشکران، لە سیمیناری یەکەمدا د.جمال علی عمر تەوەرێکی بەناونیشانی (ئیمپریالیزمی زمانی ئینگلیزی و بەرهەڵستی زمانەکانی دیکەی جیهان ) پێشکەشکرد.
پاشان سیمیناری دووەم لەلایەن د.ئیبراهیم عبدالرحمن محمد بەناونیشانی (کارلێکی زمانەوانی، "عەرەبی و ئەوانی دیکە) پێشکەشکرا.
دواتر سیمیناری سێیەم و کۆتایی لەلایەن د.بڕوا رسول احمد ، بەناونیشانی (زمانی کوردی، لەنێوان ململانێی ناوخۆیی و دەرەکیدا) پێشکەشکرا.
بە گفتوگۆ و سەرەنجی ئامادەبوان لەسەر تەوەرەکان و بەخشینی سوپاسنامەی ڕاگرایەتی بە توێژەران، کۆتایی بە کارەکانی سیمپۆزیۆمەکە هات.