مامۆستایەكی كۆلێژی زانستە مرۆڤایەتییەكان لەزانكۆی راپەڕین توێژینەوەیەكی دەربارەی پێگەی ژنانی کورد لە تێڕوانینی بەریتانیەکان لە نیوەی یەکەمی سەدەی بیستەمدا لەگۆڤارێكی نێودەوڵەتی بڵاوكردەوە.

د. قادر محمد مامۆستا لەبەشی مێژوو لەكۆلێژی زانستە مرۆڤایەتییەكانی زانكۆی راپەڕین، تازەترین توێژینەوەی زانستی خۆی دەربارەی دەربارەی پێگەی ژنانی کورد لە تێڕوانینی بەریتانیەکان لەگۆڤاری (International Journal of Kurdish Studies) بڵاوكردەوە.

د. قادر محمد لەتوێژینەوەكەیدا رونیكردۆتەوە كە کاتێک ئەفسەران و گەڕیدە بەریتانیا لەنیوەی یەکەمی سەدەی بیستەمدا سەردانی ناوچە کوردنشینەکانیان دەکرد یادەوەری و بۆچوونەکانیان لەسەر کۆمەڵگەی کوردی تۆمار دەکرد، پێگەی ژنان بایەخێکی بەرچاوی هەبوو لەو تۆمارانەدا. ئەم نوسینە شیکاری ئەو دەقانە دەکات کە گەشتیاران و ئەفسەرانی بەریتانیا دەربارەی ژنانی کورد نوسیویانە، بۆ ئەوەی بزانین کە ئایا تا چ ئاستێک نوسینەکانیان مۆرکی ڕۆژهەڵاتناسیان پێوەیە. لەڕاستیدا ئازادی ژنانی کورد، گەڕیدەکان و ئەفسەرانی بەریتانیای سەرسام کردبو و بەتایبەتی زۆر بە ئاشکرایی جیاوازییان لەنێوان ژنانی کورد و کۆمەڵگا موسڵمانەکانی دیکەدا دەکرد. ئەوان سەرسام بون بەپێگەی بەرزی ژنانی کورد لەکۆمەڵگادا، بەبێ جیاوازی چینایەتی، لەهەردوو کۆمەڵگەی گوندنشین و شاردا. ئەو نوسینانە یادداشتیان کردوە، کە ژنانی کورد ئازادییەکی بەرچاویان هەبوە، لەپۆشینی جلوبەرگ و لەمامەڵەکردنیاندا بەتایبەت لەگەڵ بێگانەو بیانیەکاندا متمانەیەکی تەواویان بەخۆیان هەبوە. جگەلەوە ژنانی کورد بەشداری سیاسەتیان کردوەو دەبونە سەرکردەی کۆمەڵگاکانیان و خۆیان پەروەردە دەکرد، ئەمەش وایکرد گەشتیاران و ئەفسەرانی بەریتانیا بەراوردیان بکەن بەژنانی ئەوروپی. ئەم توێژینەوەیە بەو دەرئەنجامە گەیشتوە کە گەشتیارو ئەفسەرە بەریتانیەکان، لەکاتێدا کە باسی ئافرەتی کوردیان کردوە، کەمتر بەتێڕوانینی ڕۆژهەڵاتناسانە لەبارەیەوە دواون. لەکاتێکدا بەچاوێکی ڕۆژهەڵاتناسانە باسیان لەزۆربەی لایەنەکانی کۆمەڵگای کوردی دەکرد.

كلیك لەم بەستەرە بكە بۆ بینینی توێژینەوەكە:
International Journal of Kurdish Studies » Submission » The Position of Kurdish Women in the View of the British in the First Half of the Twentieth Century (ijoks.com)