بەڕێوەبەرایەتی پەیوەندییەكان، راگەیاندن و چاپەمەنییەكان، لەرووی كارگێڕییەوە سەر بەسەرۆكی زانكۆیە، كار دەكات لەپێناو دروستكردنی پەیوەندییە زانستیی و فەرهەنگی و رۆشنبیرییەكانی زانكۆ لەسەر ئاستی ناوخۆیی، هەرێمی و نێودەوڵەتی، هەروەك ئەم بەڕێوەبەرایەتییە سەرپەرشتی بەڕێوەبردنی وێب سایتی زانكۆ، رادیۆی دەنگی زانكۆ و راگەیاندن و رۆشنبیری زانكۆ دەكات.

ئەو بەڕێوەبەرایەتییە لەلایەن ستافێكی زانستیی و ئەكادیمی بەڕێوەدەبرێت ، كە شارەزایی و ئەزموونیان هەیە لەبواری پەیوەندییەكان و راگەیاندندا، هەروەك سەرجەم ئەندامانی ئەو بەڕێوەبەرایەتییە شارەزایی تەواویان لەبەكارهێنانی تەكنۆلۆژیانی نوێ و بەتایبەتیش كۆمپیوتەرو ئینتەرنێتدا هەیە.
سەبارەت بەو ئەركانەی كە ئەم بەڕێوەبەرایەتییە پێیان هەڵدەستێت مامۆستا ئاراز رەمەزان بەڕێوەبەری بەڕێوەبەرایەتی پەیوەندییەكان و ڕاگەیاندن بەماڵپەڕی زانكۆی وت: كە بەڕێوەبەرایەتی پەیوەندییەكان و راگەیاندن و چاپەمەنییەكان كاردەكات لەپێناوی دروستكردنی پەیوەندی زانستی لەگەڵ زانكۆو دامەزاراوە پەروەردەیی و فێركارییەكانی ناوخۆیی، هەرێمیی و نێودەوڵەتی، دۆزینەوەی پڕۆژەی هاوبەش لەگەڵ زانكۆكانی ناوخۆو دەرەوە، هەروەها دروستكردنی پردی پەیوەندی لەرێی بەشداریكردن لەكۆنفرانسەكانی دەرەوەدا، كاركردن بۆ بەئەندامبوونی زانكۆ لەرێكخراوە جیهانییەكانی تایبەت بەخوێندن و خوێندنی باڵا هەروەك لەئێستادا زانكۆی راپەڕین ئەندامی هەردوو رێكخراوی یەكێتی زانكۆكانی جیهان و یەكێتی زانكۆكانی ئۆراسیایە كە دوو گرنگترین و زانستیترین یەكێتین لەسەر ئاستی هەرێمی و نێودەوڵەتی، هەروەها كاردەكەین بۆ ئەنجامدان و رێكخستنی كۆنفرانسی ساڵانەی زانكۆ، ئەنجامدانی وۆركشۆپ و سیمیناری زانستی و فەرهەنگی و كەلتوری لەناو زانكۆو دەرەوەی زانكۆدا، دۆزینەوەو هێنانی مامۆستایانی بیانی لەدەرەوەی وڵات، وەرگرتنی فیزا بۆ ستاف و مامۆستایانی بیانی،پێدان و بڵاوكردنەوەی زانیاری بەستافی زانكۆ دەربارەی خوێندن لەوڵاتانی دەرەوەو رەخساندنی هەلی خوێندن، هەروەها كردنەوەی سیمینارو وۆكشۆپی پێویست لەوبارەیەوە، بڵاوكردنەوەی چالاكی و دەستكەوتەكانی زانكۆو وەزارەتی خوێندنی باڵا لەوێب سایتی زانكۆو رادیۆی دەنگی زانكۆدا، میوانداریكردنی میوانانی بیانی كە بەمەبەستی كاری زانستی و دروستكردنی پەیوەندی سەردانی زانكۆمان دەكەن، ئاراستەكردنی پەیامی پەروەردەیی و فێركارییەكان لەرێی بەرنامە زانستی و ئەكادییەكانی رادیۆی زانكۆوە ، كۆمەڵێك ئەركی زانستی دیكە بەئامانجی گەشەسەندن و پێشخستنی زانكۆمان.
ئاماژەی بۆ ئەوەشكرد كە لەڕێگەی ئەم بەڕێوەبەرایەتییەوە چەندین پرۆژەی گرنگ ئەنجامدراون لەوانە پەیوەندییەكی زانستی لەگەڵ دەیان زانكۆی ئەوروپیی و ئەمریكی و بەریتانیاو ئێران و توركیا دورستكراوە، هەروەك توانراوە زانكۆی راپەڕین ببێت بەبەشێكی لەپرۆژەیەكی گرنگی یەكێتی ئەوروپا بەناوی ئیراسمۆس مەندوس مەرحەبا كە لەهەموو عێراقدا تەنیا (٤) زانكۆ ئەو فەندەیان بەدەستهێناوە كە سكۆلارشیپی خوێندنە بۆ ستافی زانكۆمان لەئاستەكانی بەكالۆریۆس، ماستەر، دكتۆرا، پۆست دكتۆرا، راهێنانی ستاف، هەر لەئێستاشدا سەرقاڵی وەرگرتنی چەند فەندێكی دیكەی هاوشێوەین كە سوودێكی زانستی زۆر بەزانكۆ دەگەیەنێت، وتیشی: توانیومانە وەك یەكەمین زانكۆی هەرێمی كوردستان دۆمەینی كوردی(.edu.krd) بۆ وێبسایتەكەمان وەربگرین كە لەئێستادا رانكی لەپێش زۆرێك لەزانكۆكانی كوردستانەوەیە، هەروەها توانیومانە ماڵپەڕی زانكۆ دیزاین بكەینەوەو چەندین گۆڕانكاری جەوهەری تێدابكەین و بیكەین بە ماڵپەرێكی نێودەوڵەتی، جگەلەوەش بەڕێوەبەرایەتییەكەمان یەكێك لەو پرۆژە زۆر گرنگانەی كە پێی هەڵساوە بنیاتنان و دروستكردنی رادیۆی دەنگی زانكۆ بووە كە تەنیا دوو زانكۆی تر لەسەر ئاستی كوردستان هەیانەو بنەمایەكی گرنگیشە بۆ كردنەوەی بەشی راگەیاندن كە هەر لەرێگەی ئەم بەڕێوەبەرایەتییەوە كاری جدی لەسەر كراوەو پرۆپۆزەل بەرزكراوەتەوەو قبوڵیش كراوە.
باسی لەوەشكرد كە چەندین پرۆژەی دیكەی گرنگیان لەبەرنامەدایەو لەساڵی ٢٠١٥ بەئەنجامی دەگەیەنن.
دەربارەی ئەو كارانەی كە لەلایەن بەڕێوەبەرایەتی پەیوەندییەكان و راگەیاندن لەساڵی ٢٠١٤ دا ئەنجام دراون ئەمین خدر ئەحمەد لێپرسراوی ڕاگەیاندن و ڕۆشنبیری زانكۆ وتی: سەبارەت بەو بەكارانەی كە بەڕێوەبەرایەتییمان لەساڵی ٢٠١٤ دا ئەنجامیداون وەك بەشداریكردن و ڕێكخستنی كۆنفرانسی ستراتیژی زانكۆ لەڕێكەوتی ٢٠١٤/٤/١٤ دا، سازدانی چالاكی ساڵوەگەڕی ڕۆژنامەگەری كوردی لە ٢٠١٤/٤/٢٢  دا، بەشداریكردن لەچالاكی ساڵیادی ڕۆژی شەهیدی زانكۆو كارەساتی ٤/٢٤ ی قەڵادزێ‌، و وێنەگرتنی ئاهەنگی دەرچوونی خوێندكارانی سەرجەم بەشەكانی زانكۆمان لە٢٠١٤/٥/٧  دا، ڕێكخستنی پەیوەندی و هەماهەنگی بەردەوام لەگەڵ كۆنسوڵی ئەمریكا لەهەولێر تائەوەی لەڕۆژی ٢٠١٤/٦/٢  كوسنوڵی ئەمەریكا و وەفدێكی هاوڕێی سەردانی زانكۆی ڕاپەڕینیان كردو پشتگیری خۆی بۆ زانكۆمان دووپاتكردەوە، بەشداریكردن لەفێستیڤاڵی زانكۆكانی ئۆراسیا لەئیستەنبوڵ لەبەرواری ٢٠١٤/٨/٤ دا، خەڵاتكردن و رێزلێنانی كەناڵەكانی راگەیاندن لە ٢٠١٤/٩/٢٥  ، كۆبوونەوەی ستافی بەڕێوەبەرایەتیمان لەگەل بەشێك لە دامودەزگا حكومیەكانی ناوچەكە لە٢٠١٤/٩/١٨  ،هەروەها بەشداریكردنی نوێنەری زانكۆی راپەڕین لەرۆژانی١٥ - ١٨ /١٠/ ٢٠١٤، لەكۆنفرانسی لوتكەی یەك جیهانی گەنج لە شاری دبلنی ئیرلەندا، ئەنجامدان و ڕێكخستنی گردبوونەوەیەك لەڕۆژی١٦/ ١٠ بەمەبەستی پاڵپشتیكردن لەبەرخۆدانی كورد لەكۆبانێ‌، ڕێكخستنی مەراسیمی سێهەمین خولی دەرچووانی زانكۆمان لە بەرواری٢٦/ ١٠ لەڕانیە و قەڵادزێ‌، ڕۆژی ٢٨/ ١٠/ ٢٠١٤ لەمەراسیمێكدا رادیۆی دەنگی زانكۆی راپەرین كرایەوە ئەمەش وەك خزمەتێك لەپێناو بەرزكردنەوەی ئاستی زانستی و ڕۆشنبیری و پەروەردەیی زانكۆمان، هەروەها سازدانی وۆركشۆپێك لەژێر ناونیشانی پێشخستنی هەلی كار لەدەڤەری ڕاپەڕین بەهاوكاری كۆمپانیای كانی توو لەڕۆژی ١٩/ ١١/ ٢٠١٤، سازدانی دیبەیتی بەرەنگاربوونەوەی توندوتیژی خێزانی لەڕۆژی ٢٤/ ١١/ ٢٠١٤ و ڕێكخستنی مەراسیمێك بەبۆنەی ساڵوەگەڕی هەڵكردنی ئاڵای پیرۆزی كوردستان و ڕێزگرتن لەكەسوكاری سەربەزی شەهیدانی ناوچەكە لەڕۆژی ١٧/ ١٢/ ٢٠١٤ بەهاوكاری یەكەی وەرزشی زانكۆمان، سەرەڕای وێنەگرتنی سەرجەم چالاكی و سیمینار و وۆركشۆپ و ... هتد كە سەرجەم بەڕێوەبەرایەتییەكان و فاكەڵتییەكان و سكوڵ و بەشەكانی دیكەی زانكۆمان پێی هەڵساون هەروەها بڵاوكردنەوەیان لە ماڵپەڕ و ڕادیۆی دەنگی زانكۆمان .