لەرێگەی زانکۆی ئەشقی تورکی لەھەرێمی کوردستان و بەسەرپەرشتی وەزارەتی خوێندنی باڵای ھەرێم، ھەریەک لەنوێنەرانی وەزارەتی خوێندنی باڵاو توێژینەوەی زانستی و زانکۆکانی راپەڕین، ھەڵەبجە، زاخۆ، گەرمیان و چەرمۆ لەئێستادا بەسەردانێکی فەڕمی لەوڵاتی تورکیان بەمەبەستی دروستکردنی پەیوەندی و لینکی زانستی لەگەڵ ژمارەیەک لەزانکۆکانی ئەو وڵاتە.

لەمیانی سەردانەکەدا رۆژی ٢٣-١-٢٠١٥دا وەفدی زانکۆکانی کوردستان کە پێکھاتووە لەھەریەک لەبەڕێوەبەرانی پەیوەندییەکانی دەرەوەی وەزارەتی خوێندنی باڵاو توێژینەوەی زانستیی و زانکۆکانی راپەڕین، ھەڵەبجە، زاخۆ، گەرمیان و چەرمۆ، گەیشتنە شاری ئەنقەرەی پایتەختی تورکیاو دواتر لە شاری کۆنیا سەردانی زانکۆی میڤلانایان کردو لەگەڵ سەرۆکی زانکۆکەو وەفدی یاوەری توری زانکۆکەیان کردو دواتر لەوۆکشۆپێکی کراوەدا زانیاری دەربارەی زانکۆی میڤلاناو زانکۆکانی کوردستان پێشکەشکران و تێیدا سیستەمی خوێندن لەھەردوو وڵات و لەزانکۆکاندا روونکرایەوە. ھەروەک لەرۆژی دووەمی سەردانەکەدا ٢٤-١-٢٠١٤، وەفدی زانکۆکانی کوردستان، بانگھێشتی زانکۆی مەلیک شا کران لەشاری قەیسەری تورکیاو لەلایەن وەفدێکی باڵای ئەنجومەنی زانکۆکەوە پێشوازیکران و دواتر لەوۆرکشۆپێکدا زانیاری دەربارەی زانکۆی مەلیک و زانکۆکانی ھەرێمی کوردستان ئاڵوگۆڕکرا. بڕیارە وەفدی زانکۆ تازەکانی کوردستان لەرۆژانی ئایندەدا سەردانی زانکۆی تورگوت ئۆزال و زانکۆی ئیپێک دەکەن لەشاری ئەنقەرەو لەگەڵ ستافی زانکۆکە کۆدەبنەوە.

ئاراز رەمەزان بەڕێوەبەری پەیوەندییەکانی دەرەوەی زانکۆی راپەڕین کە ئەندامێکی وەفدی زانکۆ تازەکانی کوردستانەو بانگھێشتی تورکیا کراون بەماڵپەڕی زانکۆی راپەڕین راگەیاند کە گەشتە زانستییەکە لەلایەن وەزارەتی خوێندنی باڵای ھەرێمی کوردستانەوە سەرپەرشتی دەکرێت و بەڕێوەبەری پەیوەندییەکانی وەزارەتیش سەرپەرشتی وەفدەکە دەکات، ھەروەک گەشتەکە لەلایەن زانکۆی ئەشقەوە رێکخراوەو مەبەستیش دروستکردنی لینک و پەیوەندی ئەکادیمی و زانستییە لەنێوان ژمارەیەک زانکۆی تورکیاو زانکۆ تازەکانی کوردستان، وتیشی: لەسەردانەکەدا پەیوەندی لەگەڵ زانکۆکان دروستدەکرێت و ھەنگاوێکیش دەبێت بۆ واژۆکردنی یاداشتی لێکتێگەیشتن لەنێوان ئەو زانکۆیانەدا لەداھاتوودا لەھەریەک لەبوارەکانی گەشەپێدانی پڕۆگرامەکانی خوێندن، ئاڵوگۆڕی ستافی ئەکادیمی و مامۆستایان و خوێندکاران، ھەروەھا بەشداریکردن لەکۆنفرانسە ئەکادیمییەکانی زانکۆکان و ئەنجامدانی توێژینەوەی زانستی ھاوبەش.