کوردی 
English 
بۆ تاوتوێکردنی ئەو بارودۆخە نەخوازراوەی کە ئێستا لە هەرێمی کوردستان هاتووەتە پێشەوە، ئەمڕۆ سێ شەممە ١٠/٦/ ٢٠١٥ ئەنجومەنی زانکۆی راپەڕین کۆبووەوە، لە کۆبوونەوەکەدا چەند تەوەرێکی گرنگ و پەیوەندار بە بارودۆخی ئەمڕۆی هەرێمی کوردستا گفتوگۆیان لەبارەوە کرا. لە کۆتایی کۆبونەوەکەشدا ئەنجومەنی زانکۆی راپەڕین راگەیەنراوێکیان بڵاوکردەوە.
ئەمەش دەقی راگەیەنراوەکەیە:
راگەیەنراوی ئەنجومەنی زانکۆی راپەڕین سەبارەت بە بارودۆخی ئەمڕۆی هەرێمی کوردستان
سڵاوی زانست و پەرۆشی..
لەبەر رۆشنایی ئەو بارودۆخە هەستییارەی کە ئەمڕۆ لە هەرێمی کوردستان پێیدا تێپەڕدەبێت، ئێمە (ئەنجومەنی زانکۆی راپەڕین) وەک بەرپرسیارێتییەکی ئێتیکی و مێژوویی ئەم سەرنج و پێشنیارانەی خوارەوە دەخەینەڕوو:
١- دۆخەکە زۆر هەستییارە و پێویستی بە مامەڵەی هۆشیارانە هەیە، بە پێچەوانەوە کاریگەریی نەرێنی لەسەر سەرجەم بوارەکان دەبێت، بە تایبەت پڕۆسەی پەروەردە و خوێندنی باڵا، لەبەرئەوەی ئەو بوارە گرنگە وابەستەی زەمەن و تەمەنە، و پەڕینەوە لەو قۆناغە و بەسەرچونی کاتەکە قەرەبووکردنەوەی ئه‌ستەمە.
٢- کۆچی بەلێشاوی خوێندکاران و لاوانی کوردستان یەکێکە لە سیما نەخوازراوەکانی بارودۆخەکە و پێویستی بە پلانی ورد و ستراتیژیی لایەنە پەیوەندیدارەکان هەیە.
٣- بە هەموو شێوەیەک پشتیوانی لە داوا رەواکانی هاوڵاتییان و دەنگی ناڕازیی شەقامی کوردستان دەکەین، له:
ا- دابینکردنی سەرجەم مافە داراییەکانی هێزەکانی پێشمەرگە و موچەخۆرانی هەرێمی کوردستان، کە دواکەوتنیان ئاکامی نەخوازراوی سیاسی و ئابوری و کۆمەڵایەتی و... هتدی لێدەکەوێتەوە.
ب- راگەیاندن و ئەنجامدانی چاکسازی ریشەیی و پلان بۆ داڕێژراو لە بوارەکانی کارگێڕی و دارایی و سیاسی، کە ئامانج لێی باشترکردنی گوزەرانی خەڵکی کوردستان بێت و بە دوور بێت لە هەموو جۆرە ململانێیەک.
ج- جیاکردنەوەی بژێویی هاوڵاتیانی هەرێمی کوردستان لە گەمەی دیموکراسی و ململانێی نێوان لایەنە سیاسییەکان.
بە هیوای تێپەڕاندنی قەیرانەکان و دۆزینەوەی چارەسەرێکی گونجاو و بنەڕەتی.
ئەنجومەنی زانکۆی راپەڕین
٦ / ١٠ / ٢٠١٥
