ئەمڕۆ سێشەممە ٨ /۱۲ /۲۰۱٥  لە مەراسیمێكدا وەزارەتی خوێندنی باڵاو توێژینەوەی زانستی ریزبەندی باشترین زانکۆکانی هەرێمی ڕاگەیاند.

هەروەک لە ڕیزبەندییەکەدا هاتووە" زانکۆکانی هەرێم کراون بە چەند گروپێکەوە لە گروپی A کە یەکەمە هیچ زانکۆیەکی تێدا نییە بەڵام لە گروپی B لە ڕیزبەندییەکەدا "زانکۆی کۆیە و سەلاحەدین و سۆران و زانکۆی سلێمانی " لەخۆگرتووە.

هەروەها لە گروپی C ڕیزبەندیەکەدا ناوی چەند زانکۆیەک هاتووە و زانکۆی ڕاپەڕین لەو گرووپەدایە، زانکۆکان بریتین لە زانکۆی " دهۆک و گەرمیان و هەولێری پزیشکی و زانکۆی ڕاپەڕین "

هاوکات لەبارەی باشترین زانکۆ ئەهلییەکانی هەرێم بە هەمان شێوە گروپی A  ناوی هیچ زانکۆیەکی تێدا نیە، بەڵام لە گروپی Bی ریزبەندییەکە بەم شێوەیە "زانکۆی ئەمریکی لە سلێمانی لە پلەی یەکەمدایە و زانکۆی جیهان لە سلێمانی لە پلەی دووەمدایە و زانکۆی گەشەپێدانی مرۆیی لە پلەی سێیەم دایە ".

لە مەراسیمەکەدا یوسف گۆران وەزیری خوێندنی باڵاو توێژینەوەی زانستی دەربارەی پڕۆسەکە بۆ دەزگاکانی ڕاگەیاندن وتی " بۆ ئەوەی بزانین ئێمە لە کوێین و لە چ ئاستێکداین و کلتووری کیبڕکێی زانستی لەنێوان زانکۆکانی هەرێمدا درووستبکەین کاری ڕیزبەندی بۆ زانکۆکان دەکەین"

وەزیری خوێندنی باڵا جەختى لەسەر ئەوەش کردەوە کە زانکۆکان لە ناو گروپەکاندا بەپیى (ئەلفا بێتى) ئینگلیزى دانراون.

یەکەم: زانکۆ حکومیەکان

گروپى A: هیچ زانکۆیەک نەگەیشتۆتە ئەم ئاستە

گروپىB زانکۆکانى (کۆیە، سەڵاحەددین، سۆران، سلێمانى، زاخۆ)

گروپىC: زانکۆکانى (دهۆک، گەرمیان، هەولێرى پزیشکى، ڕاپەڕین).

گروپىD: زانکۆکانى (چەرمۆ، پۆلیتەکنیکى دهۆک، پۆلیتەکنیکى هەولێر، هەڵبجە، پۆلیتەکنیکى سلێمانى)

دوەم: زانکۆ تایبەتەکان

گروپىA: هیچ زانکۆیەک نەگەیشتۆتە ئەم ئاستە

گروپىB: زانکۆکانى (ئەمریکى لە سلێمانى، جیهان لە سلێمانى، زانکۆى گەشەپێدانى مرۆیى لە سلێمانى)

گروپىC: زانکۆکانى (جیهان لە هەولێر، ئیشق لە هەولێر، کۆمار لە سلێمانى، نەورۆز لە دهۆک)