دوێنی، ٣٠ی ٤ی ٢٠٢٠، بە فەرمی و بە ئامادەبوونی نوێنەرانى زانکۆکانى هەرێمى کوردستان هاوشان لەگەڵ زانکۆکانى دیکەى ناوچەکانى عێراق، خولی فێربوونی ئەلیکترۆنی Training of Trainers (ToT)، کە لەلایەن ڕێکخراوی ئایرێکیسی ئەمریکییەوە ڕێکخراوە، دەستی پێکرد و بۆ ماوەی ٨ هەفتە بەردەوام دەبێت و بەشێوەی سەرهێڵی دەبێت.

شایەنی باسە، خولەکە بە وتەی هەریەک لە د. فواد قاسم، بریکارى وەزیری خوێندنی باڵا و توێژینەوەی زانستی و بەرپرسی کاروباری گشتی لە بالوێزخانەی ئەمریکا لە بەغداد و د. لۆری مەیسن، بەرێوەبەری بەرنامەکانی رێکخراوی ئایرێکس لە عێراق و عەبدولفەتاح عەبدولرەزاق بریکارى وەزارەتى خوێندنى باڵاى هەرێم دەستی پێکرد و تیایدا ئاماژەیان بە زانکۆ بەشدارەکان کرد، کە ٩٨ زانکۆى عێراق و ١٤ زانکۆى هەرێمى کوردستان و کە ٩٠٠ کەس لەم پرۆگرامە بەشدارن. هەروەک نوێنەرى ڕێکخراوى ئایرێکس هەوڵەکانى وەزارەتى خوێندنى باڵاى هەرێم و فەرمانگەى نێردراوان و پەیوەندییە رۆشنبیرییەکانی بەرزنرخاند بۆ ئامادەگییان بەمەبەستى بەشدارى کارا لە خولەکەدا.
لەم خولە هەشت هەفتەییەدا، ١٠ مامۆستای زانکۆی ڕاپەڕین بەشدارن و بە شێوەیەکی چڕ و پڕ و بە سەرهێڵی (Online) بەڕێوەدەچێت. خولەکە پێکدێت لە سێ بەش و هەربەشێکیش لە چەند یەکەیەک پێکدێت. بەپێی ناوەڕۆکی خولەکە بەشداربوو لەگەڵ تەواوکردنی خولەکە وەکو ڕاهێنەر ئامادە دەبێت و دەتوانێت خولی هاوشێوە بۆ ستافی زانکۆکانی خۆیان و دامەزراوەی تریش بکەنەوە و خوێندنی ئەلیکترۆنی زیاتر پەرەپێبدەن لە دامەزراوەکانیاندا.
جێگەى ئاماژەیە، تەواوی ئەرکی دارایی پرۆژەکە لە ئەستۆی باڵیۆزخانەی ئەمریکایە لە عێراق، بەڵام جێبەجێکردنەکەی دەکەوێتە ئەستۆی رێکخراوی ئایرێکس.