زانکۆی ڕاپەڕین بە مەبەستی بە ئەلکترۆنیکردنی سیستمی وەرگرتنی خوێندکاران و ڕێکخستنی دۆسییەکان،لە ڕێگەی لیژنەیەکی تایبەتی پسپۆڕەوە بەسەرپەرشتی بەڕێز "د.هێرش رسول" یاریدەدەری سەرۆکی زانکۆ بۆ کاروباری خوێندکاران و بە هەماهەنگی بەڕێوەبەرایەتی پەیوەندییەکان، ڕاگەیاندن و تەکنەلۆجیای زانیارییەکان و تۆماری گشتی زانکۆی ڕاپەڕین بەرنامەیەکی تایبەت ئامادەکراوە، بۆ ئەوەی خوێندکارانی تازە وەرگیراو لەزانکۆکە فۆڕمی زانیاری خوێندکار "فۆڕمی خۆتۆمارکردن" لەسەر ماڵپەڕی فەرمی زانکۆ پڕبکەنەوە.

ئەمڕۆ سێ شەممە ٢٠١٥/١٢/٢٩ زانکۆی ڕاپەڕین لە بانگەوازێكدا هاوشێوەی زانكۆكانی دیكەی هەرێمی كوردستان بە نوسراوێکی فەرمی ژمارە (٤٥١٢/٢٩/٧) بۆ ئەمساڵی خوێندن (٢٠١٥-٢٠١٦)، خوێندن بەشێوەی سیستمی (پاراڵێڵ)ی ڕاگەیاند، سیستمەکە بریتییە لەوەرگرتنی خوێندکاران‌و خوێندنیان لە سەرجەم فاکەڵتی و سکوڵ و بەشەکانی زانکۆی ڕاپەڕین لەبەرامبەر بڕێک پارەی ساڵانەدا.

دوای ئەوەی وەزارەتی خوێندنی باڵا و توێژینەوەی زانستی ناوی وەرگیراوانی لەزانکۆو پەیمانگاکانی هەرێم بڵاوکردوە، لە پڕۆسەکەدا ژمارەیەک خوێندکار ناویان لەهیچ زانکۆ و پەیمانگایەک نەهاتەوە، لەپێناو بەرژەوەندی ئەو خوێندکارانە و بێبەش نەبونیان لە پڕۆسەی خوێندن، زانکۆی ڕاپەڕین خوێندن بەشێوەی سیستمی (پاراڵێڵ)ی دەکاتەوە، بۆ ده‌رچوانی لقی (زانستی‌ و وێژه‌یی).

زانكۆی ڕاپەڕین لە بانگەوازەکەدا خوێندكارانی دەرچووی لقی زانستی و وێژەیی ساڵەکانی ( ٢٠١٢-٢٠١٣ ، ٢٠١٣-٢٠١٤ ، ٢٠١٤-٢٠١٥ ) ئاگادار دەكاتەوە، كە دەتوانن لە ڕۆژی چوارشەممە رێكەوتی (٢٠١٥/١٢/٣٠ تا ٢٠١٦/١/١٠) لە بەڕێوەبەرایەتی تۆماری گشتی زانکۆی ڕاپەڕین فۆڕمی داواکاری پڕبكەنەوە.

بەبۆنەی ساڵی نوێ ی(٢٠١٦)ەوە، پیرۆزبایی گەرم لە گشت خانەوادەی شەهیدانی ڕێگای رزگاری کوردستان و مامۆستایان و فەرمانبەران و خوێندکارە خۆشەویستەکانمان دەکەین..
 هیوا خوازین لەم ساڵەدا هەموو خۆشحاڵ و شادمان و سەرکەوتووبن، وە ئومێدی داهاتوویەکی ئازادو سەقامگیر و گەشەسەندو بۆ گەلی کوردمان دەخوازین و داوای سەرکەوتن و سەلامەتی بۆ برا پێشمەرگە قارەمانەکانمان دەخوازین لە بەرەکانی جەنگ، کە بەگیانی خۆیان خاک و سنوری کورستانی خوشەویست دەپارێزن.

                                                 پ.د.محمد علی عبداللە
                                                 سەرۆکی زانکۆی ڕاپەڕین