هەفتەی نێودەوڵەتی خوێندکاران لەئێران (ISW-Iran) رێكدەخرێت

هەفتەی نێودەوڵەتی خوێندکاران لەئێران (ISW-Iran) چالاکیەکی زانستی-فەرهەنگییە، کە لەلایەن خوێندکارانەوە بۆ خوێندکاران ڕێکدەخرێت. زیاتر لە ٣٥ بەشداربو لەزیاتر لە ٢٠ وڵاتی جیاوازەوە بەشدارییان لەدوایین ISW-Iran لە ساڵی ٢٠٢٠دا کرد.
ئەمساڵ ISW-Iran بەهاوبەشی لەلایەن زانکۆی تاران و دامەزراوەی گەشەپێدانی ڕۆژئاوای ئاسیا Western Asian Development Institute ڕێکدەخرێت. ئەم بۆنەیە ئەزموونێکی ناوازەیە کە وێرکشۆپی پەروەردەیی و ناسینی کەسانی نوێ لەخۆ دەگرێت.
ئامانجی سەرەکی ISW-Iran کۆکردنەوەی گەنجانی هەموو جیهانە، وەک سەکۆیەک بۆ ئاڵوگۆڕی کەلتوری و یەکترناسین و هەروەها بۆ گفتوگۆ و کاری بیرۆکە بۆ چارەسەرکردنی ئاڵنگارییە جیهانییەکانە.
لەماوەی پێنج ڕۆژدا، بەشداربوان ڕوانگەیەکی باش لەئێران پێکدەهێنن. هەروەها بەکارکردن لەنزیکەوە لەگەڵ خوێندکارانی ئێرانی ئاشنادەبن و چاویان بەلاوانی هاوبیر لەهەموو جیهاندا دەکەوێت. بەشداربوان دەرفەتیان دەبێت بۆ گەڕان بەدوای جوانی سروشت و کلتوری وڵاتەکە.
هەفتەی نێودەوڵەتی خوێندکاران لەئێران پێشوازی لەسەرجەم خوێندکاران لەهەر بوارێکی خوێندن دەکات. هەروەها خوێندکارانی تازە دەرچوو، گەنجانی چالاک و سەرکردەکان هاندەدرێن بۆ پێشکەشکردنی داواکاری بۆ بەشداریکردن.

سوودەکانی بەشداریکردن
بەشداریکردن لە وانەکان کە لەلایەن زانا و لێکۆڵەری نێودەوڵەتی دیارەوە پێشکەشدەکرێن.
بەشداریکردن لەگفتوگۆکان و سەردانیکردنی شوێنەکان
دەرفەتێکە بۆ گەڕان بەناو فەرهەنگ و سروشتی ئێراندا.
دەرفەتی کارلێککردن لەگەڵ کەسانی جیاواز لەنەتەوەو کەلتوری هەمەجۆر.
بەشداربوان لەپڕۆگرامەکە بەخۆڕایی دەبێت.
نانی بەیانی و نیوەڕۆ و ئێوارە دابیندەکرێت.
گەشتی ڕێنماییکراو بەخۆڕایی بەناو تاراندا ڕێکدەخرێت.
ئامرازەکانی وەرزش (مەلەوانگە، هۆڵی وەرزش، یاریگای تۆپی پێ) بێبەرامبەرە.

مەرجەکانی شایستەبون بۆ بەشداریكردن:
گەنجانی پیشەیی و خوێندکار مافی پێشکەشکردنیان هەیە لەهەر نەتەوەیەک.
تەمەن: 18 بۆ 35 ساڵ.
توانای گفتوگۆکردن بەزمانی ئینگلیزی.

داواکاران پێویستە کرێی تکتی فڕۆکە لەوڵاتی خۆیانەوە بۆ تاران و بەپێچەوانەوە، کرێی ڤیزا، و بیمە (ئەگەر پێویست بوو) خۆیان دابینی بکەن.

پرۆسەی پێشکەشکردن:
هەنگاوی یەکەم- ئەم فۆڕمەی خوارەوە پڕبکەرەوە لە ڕێگەی لینکی داواکارییەوە تا بەرواری ١٠ی ئابی ٢٠٢٢.
https://bit.ly/iswiran2022 یاخود https://forms.gle/TkBJgie8ZEQHuoBV7
هەنگاوی دووەم- کاندیدە هەڵبژێردراوەکان تا ٥ی ئابی ٢٠٢٢ لە ڕێگەی ئیمەیڵەوە ئاگادار دەکرێنەوە.
هەنگاوی سێیەم- خوازیارانی هەڵبژێردراو بانگهێشت دەکرێن بۆ پرۆگرامە کە لە زانکۆی تاران لە ١٠ - ١٣ی ئەیلوولی ٢٠٢٢ بەڕێوەدەچێت.
تێبینی:
لە پرۆسەی وەرگرتنی ڤیزادا هاوکاری بەشداربوان دەکرێت.
ڤیزای ئێران ئەلیکترۆنییە، هیچ مۆر و ستیکەرێکی ڤیزا لەسەر پاسپۆرتەکەت نابێت.
هەفتەی نێودەوڵەتی خوێندکاران بە لەبەرچاوگرتنی ڕێوشوێنەکانی COVID 19 ڕێکدەخرێت.

هەردو وەزارەتى خوێندنى باڵا و کار، یاداشتنامەیەکى لێکگەیشتن ئیمزادەکەن

بەئامانجى بەستنەوەى زیاترى پرۆگرامەکانى خوێندنى زانکۆ و پەیمانگەکانى هەرێمى کوردستان بە بازاڕى کار و ئاشنابونى زیاترى خوێندکاران بەیاساکانى کارو خانەنشینى دەستەبەرى کۆمەڵایەتى، یاداشتنامەیەکى لێکگەیشتن لە نێوان هەردو وەزارەتى خوێندنى باڵا و توێژینەوەى زانستى و کار و کاروبارى کۆمەڵایەتى ئیمزا کرا.

ئەمڕۆ سێشەمە ڕێکەوتى (2022/8/9) بەسەپەرشتى د. ئارام محمد قادر، وەزیرى خوێندنى باڵا و توێژینەوەى زانستى و کوێستان محمد، وەزیرى کارو کاروبارى کۆمەڵایەتى و ئامادەبونى بریکارانى هەردو وەزارەت و ڕاوێژکار و بەڕێوبەرانى گشتى، لە ڕێوڕەسمێکدا یاداشتنامەى لێکگەیشتنى نێوان هەردو بۆ وەزارەت بۆ پەرەپێدانى زیاترى پرۆسەى بەکارخستن و بنیادنانى کارامەیى ئیمزاکرا.

لە دەستپێکدا وەزیرى کارو کاروبارى کۆمەڵایەتى ئاماژەى بە گرنگى ئیمزاکردنى ئەم یاداشتە کردو ڕایگەیاند: ئامانجى سەرەکى لەم یاداشتە دروستکردنی هەماهەنگی زانستی و سود وەرگرتنە لە توانا ماددی و مرۆییەکانی نێوان هەردو وەزارەت و ئاڵوگۆڕی زانیاری سەبارەت بە پێداویستییەکانی بازاڕی کار و گونجاندنی لەگەڵ ناوەڕۆکی پڕۆگرامی خوێندن و ڕاهێنان لە زانکۆکان. وتیشى: بەپێى خاڵەکانى یاداشتەکە هەماهەنگى دەکرێت لەنێوان (بەشەکانی بەکارخستنی بەڕێوەبەرایەتیەکانى کار)ى سەر بە وەزارەتى کار لەگەڵ (سەنتەرەکانی گەشەپێدانی کار-CDC)ی زانکۆکانی کوردستان بۆ تۆمارکردنى ناوى دەرچوانى زانکۆ و پەیمانگەکان بۆ مەبەستی ڕاهێنان و دۆزینەوەى هەلى کار لە کەرتى تایبەت بۆ دەرچوانی بێکار.

لەلایەن خۆیەوە وەزیرى خوێندنى باڵا و توێژینەوەى زانستى ئاماژەى بە خاڵە گرنگەکانى ئیمزاکردنى یاداشتنى نێوان هەردو وەزارەت کردو ڕایگەیاند: فراوانکردنی پانتایی خوێندنی تەکنیکی و ڤۆکەیشنەڵ و بەستنەوەی زیاتری پرۆسەی خوێندنی تەکنیکی بە پێداویستییەکانی بازاڕی کار و داڕشتنەوەی ستراتیجی خوێندنی پیشەیی و تەکنیکی لە کوردستان، لە کارە گرنگەکانى وەزارەتەکەمانە لەم کابینەیە، بۆیە ئیمزاکردنى ئەم یاداشتنامەیە یارمەتیدەرمان دەبێت بەمەبەستى گرنکى دانى زیاتر بە خوێندنى پیشەیى و تەکنیکى.

هەروەک وتیشى: ئەنجامدانی کاری هاوبەش بۆ دەستنیشانکردنی کارامەییە پێویستەکان (Skill needs) و کەلێنی کارامەیی (Skill Gaps) و گونجاندنی لەگەڵ پێداویستییەکانی بازاڕی کار و ئاراستەی گەشەکردنی ئابوری کوردستان، هەروەها هەماهەنگی بۆ بەدواداچونی دەرچوان بەمەبەستی کۆکردنەوەی زانیاری لە بارەی ڕێژەی دەستکەوتنی کار و هەڵسەنگاندنی ئاستی پەیوەندی کاری دەرچوان بە پسپۆڕی و کارامەییەکانیانەوە خاڵى سەرەکى نێو یاداشتەکەن.

جێگەى ئاماژەیە بەشێکى دیکەى یاداشتنامەى لێکگەیشتنى نێوان هەردو وەزارەت بریتیە لە: هاندانی توێژەران لە زانکۆکانی هەرێمی کوردستان بۆ ئەنجامدانی توێژینەوەی زانستی دەربارەی کاریگەرییەکانی جێبەجێکردنی (یاسای کار و یاسای خانەنشین و دەستەبەری کۆمەڵایەتی بۆ کرێکاران) لەسەر بازاڕی کار و گەشەکردنی ئابوری هەرێمی کوردستان، هەروەها ڕەخساندنی دەرفەتی ڕاهێنان بۆ خوێندکارانى زانکۆ پۆلیتەکنیکییەکان بەمەبەستى سود وەرگرتن لە وەرشەکانى ڕاهێنانى پیشەیی سەر بە وەزارەتى کار و کاروبارى کۆمەڵایەتى و هاندانی دەرچوانى زانکۆکانی هەرێمى کوردستان بۆ بەشداریکردن لە خولەکانى ڕاهێنانى پیشەیی و خولەکانى بەهێزکردنى تواناکان بۆ ئامادەکردنى گەنجان تاوەکو بتوانن دوای دەرچون بە پڕۆژەوە بچنە ناو بازارى کار.