كۆچی یەكجارەكیی گەورە ڕەخنەگری بواری ئەدەبیاتی كوردی و ئەفسانەناسیی جیهانی (دكتۆر عەزیز گەردی) لە دڵەوە خەمباری كردین. بەو هۆیەوە پرسە و سەرەخۆشی لە بنەماڵە و كەسوكار و خوێنەران و خۆمان دەكەین. كۆچكردنی نووسەری ناوبراو بە كوژانەوەی ئەستێرەیەكی گەشی ئەدەبیاتناسیی كوردی دەزانین و بۆشاییەكی گەورە لە كتێبخانەی كوردی و ڕەخنەی ئەدەبیی كوردی دروست دەكات. كۆچكردوو زیاتر لە شەش دەیەیە بێ پشوو خزمەتێكی نەبڕاوەی بە هەردوو شێوە (نووسینی كتێب و وەرگێڕان) و (وانەگوتنەوە لە زانكۆ) كردووە و، خەرمانێك لە بەرهەمی بۆ ئەمڕۆ و داهاتوو وەدیهێناوە. لە ماوەی ژیانیدا دەیان كتێبی (لێكۆڵینەوەی ئەدەبی كوردی) نووسیوە و (دەیان كتێبی جیهانی بە زمانە زیندوو و جۆربەجۆرەكانی دنیا وەرگێڕاوەتە سەر زمانی كوردی). لە یەزدانی مەزن دەخوازین كۆچكردوو بخاتە بەر ڕەحمەتی خۆی و شەونخونی و تەقەلاكانی بە چاكە و خوداپەرستی هەژمار بكات. إنّا لله وإنّا إليهِ رَاجعُون سەرۆكایەتیی زانكۆی ڕاپەڕین ٦-٦-٢٠٢٢

ڕۆژی یەکشەممە ڕێکەوتی ٥ی حوزەیرانی ۲۰۲۲، لەدیوانی وەزارەتی خوێندنی باڵا و توێژینەوەی زانستی کۆبوونەوەیەکی تایبەت بە سیستمی ئەلیکترۆنی لە‌چوارچێوە‌ی پڕۆژە‌ی خزمە‌ت و بڵاوکردنەوەی زانیارییەکان لە‌ڕێی پۆرتاڵی خزمە‌ت بەڕێوەچوو .

چوار ستافی ئەکادیمی زانکۆی ڕاپەڕین بەشداریان کرد لە "هەفتەی بە نێودەوڵەتیکردن " لە چوارچێوەی پڕۆگرامی ئیراسمەس پڵەس کە لە زانکۆی پۆڤیشلانسکی وڵاتی پۆڵەندا بەڕێوەچوو، بە بەشداری ٣٠ زانکۆ لە وڵاتانی جیاوازەوە.