ئەمڕۆ شەممە (29ی نیسانی 2023) لەهۆڵی چالاكیەكانی زانكۆ، بەبۆنەی رۆژی جیهانی ڤێتەرنەری بەشی بایۆلۆجی لەكۆلێژی زانستی زانكۆی راپەڕین و لقی راپەڕینی سەندیكای پزیشكانی ڤێتەرنەری سیمپۆزیۆمێكیان دەربارەی رۆڵی پزیشكیی ڤێتەرنەری لەكۆمەڵگادا رێكخست.

ئەمڕۆ دوو شەممە (٢٤ی نیسانی ٢٠٢٣)، بەڕێز پڕۆفیسۆری یاریدەدەر د. پەیمان رمضان احمد سەرۆکی زانکۆ ڕاپەڕین بە یاوەری ژمارەیەك لەئەندامانی ئەنجومەنی زانکۆی راپەڕین بەشداریان کرد لە مەراسیمی (٤٩مین) ساڵیادی راپەڕین و بۆردومانی شاری قەڵادزێ و رۆژی شەهیدی زانکۆ، کە لە گۆڕستانی شەهیدان بەڕێوەچو.

لەمێژووی بزوتنەوەی رزگاریخوازی گەلی كورد لەباشوری كوردستاندا، دەڤەری پشدەرو شاری قەڵادزێ پێگەیەكی گرنگی شۆڕشگێڕی هەیەو ناوچەكە خاوەنی دەیان نەبەردی و روداوی شۆڕشگێڕیە، بەتایبەت لەمێژووی شۆڕشی نوێی گەلەكەماندا. دوایئەوەی رژێمی بەعسی فاشیست و دیكتاتۆر بڕیاری گواستنەوەی زانكۆی سلێمانی-دا بۆ شاری قەڵادزێ، شارەكە باوەشی نیشتمانپەروەری و كوردایەتی بۆ مامۆستایان و خوێندكارانی زانكۆی سلێمانی كردەوە، بەڵام بەداخەوە به‌هۆى ترسى رژێم له‌ئاوێته‌بوونى تێکۆشانی چه‌ك و پێنوسی به‌رگرى و كۆبوونه‌وه‌یان له‌یه‌ك سه‌نگه‌رى خەبات و تێکۆشاندا، رژێمی دیكتاتۆری بەعس لەبەرەبەیانی رۆژی (٢٤ – ٤ - ١٩٧٤)، بەفڕۆكەی جەنگی و چەكی ناپاڵمی قەدەغەكراو شاری قەڵادزێی بۆردومانكردو زانكۆی سلێمانی كە بەزانكۆی شۆڕش ناسرابوو لەو شارە شەهید كردو ئەو تاوانە چەندین مامۆستاو خوێندكاری زانكۆكەو خەڵكی مەدەنی شارەكەی بریندارو شەهید كرد.
ئەم تاوانە نامرۆییە خەڵكی دەڤەری پشدەری لەكوردایەتی و شۆڕش و راپەڕین سارد نەكردەوە، بەپێچەوانەوە، دوای چەند ساڵێك لەساڵوەگەڕی ئەو كارەساتەدا، خەڵكی نەبەردو سەربەرزی قەڵادزێ و پشدەر لەرۆژی (٢٤ – ٤ -١٩٨٢)دا خۆپیشاندانی جەماوەریان رێكخست، بەڵام بەداخەوە رژێمی بەعس جارێكی تر قەڵادزێی شەهید كردەوە. ئەم تاوانكارییە نامرۆڤانەیەی ڕژێمی بەعس، زامێکی قوڵ و ساڕێژنەکراوی لەدڵی دانیشتوانی قەڵادزێ و كوردستاندا دروستكردوە. هەربۆیە لەپاڵ ئەم رووداوە مێژوویی و نەتەوەییانەدا لەپێناو بەرزڕاگرتنی یادی شەهیدان و قوربانیانی مەرگەساتی بۆردومانی قەڵادزێ و زانکۆی سلێمانی، حکومەتی هەرێمی کوردستان، ڕۆژی ٢٤/ ٤ی وەک ڕۆژی شەهیدی زانکۆ دیاریکردوە.