لەئێستادا دەرفەتی خوێندنی ماستەر لەژێر پڕۆگرامی (CHEVENING) لەبەریتانیا كراوەتەوە و دوا مۆڵەتیش بۆ پێشكەشكردنی داواكاری رۆژی ٢٠١٤/١١/١٥ یە.

پرۆگرامی CHEVENING یەكێكە لەو پرۆگرامە نێودەوڵەتیانەی حكومەتی بەریتانیا لە لایەن ئۆفیسی دەرەوە و سەرچاوە سروشتیەكان (FCO) بە هاوبەشی هەندێ رێكخراو پاڵپشتی دارایی دەكرێت. پرۆگرامەكە یارمەتی فێرخوازان دەدات بۆئەوەی خوێندنی باڵا لەزانكۆكانی بەریتانیا بخوێنن.

ئەم پرۆگرامە لە ساڵی ١٩٨٣ دامەزراوە و برەوی پێدراوە بۆ بەرنامەیەكی نێودەوڵەتی. فێرخوازان لە ١٥٠ وڵات و هەرێمەوە بەشداری دەكەن لە سەرانسەری جیهانەوە جگەلە وڵاتە یەكگرتووەكانی ئەمریكاو یەكێتی ئەوروپا هەروەك عێراقیش یەكێكە لەو وڵاتانەی كە پڕۆگرامەكە دەیگرێتەوە، بۆ ئەمساڵیش پڕۆگرامەكە زیاتر لە ١٥٠٠ فێرخواز وەردەگرێت.

پرۆگرامەكە پاڵپشتی دارایی تەواو یان بەشی دەكات بۆ هەموو كۆرسەكان (بروانامەی ماستەر بەماوەی یەك ساڵ) لە هەر بابەت و بوارێك و لەهەر زانكۆیەكی بەریتانیا. ئەو كەسانەی كە ئەم پرۆگرامە دەیانگرێتەوە:

• دانیشتوی یەكێك لەو وڵاتانە بێت كە ئەم پرۆگرامە دەیگرێتەوەو لەدوای تەواوبونت بگەرێیەوە ئەو شوێنەی كە لێوەی هاتویت.

• لانیكەم دوو ساڵ خزمەتت هەبێت.

 • داواكارییەكانی ئەم پرۆگرامە بۆ زمانی ئینگلیزی جێبەجێ بكەی پێش ٢٠١٥/٧/١٥.

• لانیكەم پێشكەشی سێ كۆرسی جیاوازی زانكۆكانی بەریتانیا بكە ( ئەگەر لەبابەتە تایبەتیەكەی خۆت نەبوو.

 • فێرخواز پێشتر لەبەریتانیا نەیخوێندبێت كە لەلایەن ئەو وڵاتەوە پالپشتی دارایی كرابیت.

بۆ زانیاری زیاتر سەردانی لینكی هاوپێچ بكەن :  http://www.chevening.org/

رۆژی ٢٠١٤/٨/٤ بەئامادەبوونی زیاتر لە ١٥٠ بەشداربوو لە ٤٠ وڵاتی جیاواز فێستیڤاڵی زانكۆكانی ئۆراسیا لەشاری ئیستەنبولی توركیا دەستیپێكردو وەفدی زانكۆی راپەڕینیش كە لە دوو خوێندكار و مامۆستایەكی سەرپەرشتیار پێكدێت بەشداریان كردو چالاكییەكانیان پێشكەشكردن.

یەكێك لەبەشداربووەكانی فێستیفاڵەكە كە خوێندكارێكی زانكۆی راپەڕینە بەناوی شاكۆ محمد سیمینارێكی زانستی دەربارەی " جینۆسایدو گۆڕانكارییە ژینگەییەكان لەكوردستان" پێشكەشكردو سەرەنجی ئامادەبووانی بۆ كەیسێكی گرنگ و مرۆیی راكێشا، هەروەك، هۆشمەند عەلی یەكێكی دیكە لەخوێندكارەكانی زانكۆی راپەڕین و بەشداربووی كۆنفرانسەكە پیشانگایەكی جلوبەرگی كوردی نیشاندا بەهاوكاری گروپێكی ئیتالی و یۆنانی و بولگاری نیشانی ئامادەبووان درا.
هەروەك جوامێر رەسوڵ مامۆستا لەزانكۆی راپەڕین و سەرپەرشتیاری گروپەكەی زانكۆی راپەڕین روونیكردەوە كە بەشدارییەكی گرنگ و سەرنج راكێشیان هەبووەو هەوڵیشیانداوە چەندین پەیوەندی زانستی و كەلتوری و فەرهەنگی دروست بكەن و زانیاریش لەبارەی زانكۆی راپەڕینەوە بدەن بەنوێنەرانی زانكۆ بەشداربووەكانی فێستیڤاڵەكە.
لەفێستیڤاڵەكەدا وڵاتانی توركیا، كوردستان، بولگاریا، ئەلبانیا، رووسیا، رۆمانیا، مۆلدۆفیا، ئیتالیا، فەرەنسا، یۆنان، سۆماڵ، فەلەستین ، جۆرجیاو ئۆكرانیاو ...هتد، بەشداربوون و تارۆژی ٢٠١٤/٨/٨ دەخایەنێت.

رادیۆی دەنگی زانکۆ رادیۆیەکی زانستی و ئەکادیمیە بۆ سنوری راپەڕین و دەزگایەکی گرنگ دەبێت بۆ بەرەو پێشبردن و گەشەی زانستی و ئەکادیمی لەسنورەکەدا. لەمانگی ئابدا رادیۆی دەنگی زانکۆی راپەڕین پەخشی تایبەتی خۆی لەسەر فریکوێنسی ٩٧.٣ مێگاھێرتس دەست پێدەکات ، رادیۆکە سەرەتا بەشێوەی پەخشی ئەزموونی (تێست) دەست پێدەکات و لەئایندەیەکی نزیکیشدا پەخشی رەسمی رادەگەیەنێت.