وەزارەتی خوێندنی باڵاو توێژینەوەی زانستی بەفرمانی وەزاری ژمارە (1019) كە ئیمزای د.یوسف گۆران وەزیری خوێندنی باڵاو توێژینەوەی زانستی حكومەتی هەرێمی كوردستان بەسەرەوەیە، دوێنی یەك شەممە، ڕێكەوتی٢٤/٨/٢٠١٤ دەری كرد، بڕیاری دواخستنی تاقیكردنەوەكانی خولی دوەمی زانكۆكانی دا بۆ ڕێكەوتی ٢٠١٤/٩/١٨ .

وەك لە فرمانە وەزاریەكەدا هاتووە و ئاڕاستەی سەرجەم زانكۆكانی هەرێمی كوردستان كراوە، تێیدا هاتوە "بەهۆی ئەو بارودۆخەی كە هەرێمی كوردستان پێیدا تێپەڕ دەبێت و لە پێناو بەخشینی دەرفەتی زیاتر بە خوێندكاران/ قوتابیان بۆ تاقیكردنەوەكانی خولی دووەمی ساڵی خوێندنی (٢٠١٣-٢٠١٤) زانكۆكان و كاری پێویست ئەنجام بدەن بەمەبەستی دواخستنی تاقیكردنەوەكانی خولی دووەم بۆ  ٢٠١٤/٩/١٨ یان ڕۆژانی دواتر بەپێی بارودۆخی زانكۆكان.

زانكۆی سلێمانی لە بانگەوازێكدا هاوشێوەی زانكۆكانی دیكەی هەرێمی كوردستان ، لەبەر ڕۆشنایی هەردوو فرمانی وەزاری ژمارە (٩٥٣ لە رێكەوتی ٢٧/٤/٢٠١٤ )و ، ژمارە (١٢٢ لە رێكەوتی ٢٩/١/٢٠١٤) دەستپێكردنی خوێندنی باڵا (ماستەر) بەشێوازی هاوتەریب (پارالێل) بۆ ساڵی خوێندنی (٢٠١٤-٢٠١٥) ڕاگەیاند.

زانكۆی سلێمانی لەو بانگەوازەیدا خوێندكاران و خوازیارانی خوێندنی باڵا (ماستەر) ئاگادار دەكاتەوە، كە دەتوانن لە رێكەوتی (١٣/٨/٢٠١٤ تا ٤/٩/٢٠١٤) داواكانیان پێشكەش بەزانكۆی سلێمانی بكەن.

هەر لەو بانگەوازیدا سەرۆكایەتی زانكۆی سلێمانی ژمارەی كورسی و پسپۆڕی و ڕێنمایی و پێداویستیەكانی پێشكەشكردنی بڵاوكردۆتەوە، لەهەمان كاتدا زانكۆی سلێمانی ئەو هەواڵانەش ڕەت دەكاتەوە كە باس لەوە دەكەن زانكۆی سلێمانی وەك زانكۆكانی دیكەی كوردستان بۆ ساڵی خوێندنی (٢٠١٤-٢٠١٥) خوێندنی باڵا (ماستەر) بەشێوازی هاوتەریب (پارالێل) نەكردبێتەوە.

سکوڵی پەرستاری (١٠) کورسی خویندنی ماستەر بۆ سالی خویندنی ٢٠١٤ – ٢٠١٥ ڕادەگەیەنێت ، (٤) کورسی تایبەت بە زانکۆی ڕاپەڕینە و (٦) کورسیش بۆ گشتیە بە پێی ئەم پسپۆڕییانەی خوارەوە :

١/   (Community Health Nursing: Occupational Health and Safety )
٢/  (Adult care/Pharmacology in Nursing, Adult Care/ Anatomy in Nursing, Adult Care/ Cardiology in Nursing)
٣/   (Psychatric and Mental Health Nursing)